天洛卡提示您：看后求收藏（詩鼎小說網網m.gzstf.cn），接著再看更方便。

「我真心覺得你寫得好睇喎！」

我本來只係眼濕濕，見到呢句之后直頭喊出嚟。如果有機會，我梗係想出書啦！不過我真心覺得自己寫得普通，未去到可以出書嘅級數。我寧愿一世出唔到書，亦唔愿意拉低「作家」呢個名銜。

「世界好現實。小說寫得好唔好，可以由數據反映出嚟。你睇下我啲點擊率——咁少！」

「或者你試下寫長篇。好多讀者追開有條癮，追追下小說就會變成追個作者本人。」

「長篇唔係我強項……」

「你試過寫長篇未？」

「中學嗰陣試過，不過無寫完。跟住無試過……」

「中學時做唔到，唔代表而家做唔到！」

短短傾咗一陣，小花竟然三番四次講中我心事，搞到我心郁郁，隻手痕痕哋。當晚，我開始寫人生中第二篇長篇小說。

因為寫得太投入，我返工時、放工之后都係寫長篇，不知不覺荒廢咗短篇，好多日無喺小說網上載小說。可惜寫小說嘅過程好似人生咁，唔係努力就代表一定得，甚至乎寫寫下會突然唔知應該點樣繼續落去。即使預先準備曬故事大綱、人物設定、資料搜集，萬事俱備，點知偏偏係欠東風，靈感話無就無。勉強跟住大綱去寫，只會寫到「形」，寫唔到「髓」。

我而家正正係遇到呢種情況，好耐都回復唔到。衰乜嘢？一定係我唔夠料！如果係有料，我一早處理咗呢個情況，點會拖咁耐？安份守己寫下短篇咪好囉，做咩要寫長篇？面係人哋畀，架係自己丟，趁未有其他人發現，不如而家放棄……我好難過，連短篇都無心機寫。唯一好彩嘅係現實生活中無人知道我放棄咗。

無寫小說之后，我啲時間松動好多。放工之后去行街買嘢，星期六、日瘋狂煲劇或者做家務。生活多咗好多內容，但係呢啲內容又好似無乜意思。人生變到好無聊，返番去嗰個「唔知為乜」嘅狀態。

不如發展其他興趣。

我叫阿敏教我打機。

「打機？你唔係鐘意寫小說咩？」阿敏打機好叻，可以一心二用，一路打，一路同我傾偈。

「我唔寫喇……我寫得唔好……」我越講越細聲，好似做咗虧心事噉。

「寫得唔好？好睇到我晚晚上網睇你更新咗未。」頭先我啱啱入房嘅時候，阿敏就嚟打嬴，而家佢連續幾次走錯位，俾敵人殺咗，明顯個心亂曬。

「你知道我用邊個小說網？」我無諗過阿敏會知道。

「你自己講嘅！嗰日你喺小說網開account，好開心噉話我知你要去追夢。」聽到阿敏噉講，我即刻記起當時自己係幾有決心，亦意識到自己而家係幾咁失敗。

「估唔到你會記得……」我丑到唔知講咩好，唯有走人：「我返出去先……」

「我從來無見過有大人可以笑得咁開心，笑到成個細路噉。」阿敏望住個mon笑得好溫柔。「我睇得出你真係鐘意寫小說。」

「我中學嗰陣已經好鐘意寫小說，不過文筆差，劇情老土……」我諗番起以前嗰種好單純嘅開心。

「自己開心咪得囉！」阿敏回復狀態，再次反殺敵人。

「我而家心情好返曬！多謝你！」我衷心多謝眼前呢個好鐘意打機嘅廢青。

「今晚你煮飯。」阿敏突然奸笑。

「好呀！」我無拒絕，照單全收。

半年后，我喺小說網開始連載長篇小說。讀者唔多，而且反應負面，絕大部份留言係話劇情好悶。好彩我早有心理準備，無論對住任何意見都好淡定，輕輕松松寫句「多謝留言」。

連載咗無耐，小花嘅新書亦喺書局上架。作為「天字第一號fans」，我梗係即刻買一本翻屋企睇。后來知道小花有簽名會，我即刻遞紙請假去排隊攞簽名。場面好墟冚，大部份人係孭住書包嘅學生，似係一放學就趕過嚟。見到小花咁受歡迎，我戥佢好開心。

「你使唔使咁感動呀？」阿敏笑我「發花癲」。

「你唔明?喇！我同小花呢啲係『知音情』！」我扮嬲，乘機大大力打阿敏手臂一下。

阿敏嘅笑容僵住，窒咗一秒先回復嬉皮笑臉個衰樣：「我凈係知道你做家務嘅時候好『滋陰』！」

三個月之后，我個連載終于完結。情況同初頭差唔多，負評佔絕大多數，不過我最在意嘅係有讀者留言話「期待你嘅下一篇小說」！我開心到呢！即刻sendmessage畀小花，想多謝小花鼓勵我，點知發現小花一早封鎖咗我！

咩事？

我上討論區睇下關于小花嘅post。好多網絡作者話小花「好假」，係唔係都讚其他網絡作者寫嘅小說好好睇，扮係欣賞佢哋嘅作品，其實係為咗博對方歡心，為自己製造人氣……睇咗唔係好多個post，我已經流曬眼淚鼻水——原來所有嘢都係假?！

阿敏聽到我索鼻，入房睇下咩事。佢望個mon幾眼，直接熄咗我部電腦。

我直覺認定阿敏一早知道：「你唔話我知？」

「我認為係haters喺度搞事，無需要太在意。」阿敏翹起雙手，半坐喺枱邊。

「你覺得……小花無……呃……我？」我冷靜咗少少。

「小花有呃你或者無呃你，對你影響好大咩？」唔知點解，阿敏突然語氣唔多好，有啲??。「如果係咁，不如你問下自己，你係咪真係鐘意寫小說，或者你知唔知道咩係『鐘意』。」

「如果我唔知咩係『鐘意』，唔通你又知咩？你鐘意乜呀？你部電腦呀？定係你玩緊隻game嘅角色呀？」面對阿敏嘅質疑，我火遮眼，不知不覺開始人身攻擊。

阿敏笑咗笑，講嘢嘅語調平淡到似係扮出嚟：「『鐘意』係遇到錯折都唔放棄，而我鐘意嘅係我以前個女朋友……」

阿敏坦白承認自己係獨子，無細妹，我住緊間房其實係佢以前女朋友嘅。佢為咗賺錢結婚，以前做地產經紀時好博命。日頭做得辛苦，夜晚放工自然會打機輕松下。但係喺佢女朋友眼中，佢就係懶，放工之后凈係識打機，乜嘢家務都唔做。有一次佢哋為家務問題嗌大交，佢女朋友嬲到離家出走，無返過嚟，仲轉工、改電話號碼、刪社交帳號……

阿敏開咗罐啤酒，一路飲，一路講，一路苦笑。「我清楚明白佢嘅意思，亦唔會去煩佢。唯一問題係我個心放唔開。我知道自己唔應該繼續掛住佢，要重新出發、搵過另一個，不過我無動力去咁做。我以前做到成隻狗咁就係為咗賺多啲錢，畀好啲嘅生活佢，等佢可以風風光光咁嫁俾我。自從佢走咗，我覺得返工完全無意義，每日只係想執到間屋整整齊齊……」

「即使你繼續唔放棄，即使你等一世，佢依然永遠唔會返嚟！」我好擔心阿敏。感情易放難收，唔係單憑理智可以解決嘅事，即係阿敏可能成世走唔出呢個陰影。

「我明白，不過偏偏放唔開……」阿敏放低啤酒罐，篤咗我個額頭一下。「你唔同呀！我嘅角色好被動，你嘅角色完全係喺主動位，無論人哋講啲乜都唔會真正阻止到你——你有手有筆就可以繼續。所以『放棄』定『唔放棄』係你話事。」

阿敏好瀟灑咁轉身離開，邊行邊背對住我講：「我記得以前幫你搵租盤嘅時候，你係個驕傲嘅人。點知嗰晚收到你嘅message，見你話自己住嘅劏房火燭，四圍問人借宿借錢。我本來抱住幸災樂禍嘅心態，想睇下你個慘樣，睇夠就趕你走。點知你又好快重新振作，仲話要追夢。當刻我覺得好感動，想繼續見到你追夢個幸福樣，決定唔會趕你走……你放心，無論你而家決定『放棄』定『唔放棄』，我都唔會趕你走——我啱啱諗通自己應該點做。」

第二日，阿敏開始搵工，好快有公司請佢。佢無再好似以前咁每日做曬所有家務，而係等放假日子同我兩份分嚟做，做完佢就返入房打機打到天昏地暗。

好佩服阿敏，話改就改，仲要改得咁徹底。反觀我自己，開口埋口話追夢，實質一遇上錯折就嗌放棄……

到底我係咪真係鐘意寫小說？我諗咗呢個問題好耐，最后我決定唔再諗，單憑感覺去做——想寫就寫，唔想寫就放低支筆，唔會再為寫而寫。我發現自己寫小說嘅次數越嚟越頻密，投入程度越嚟越高，連大老闆喺身邊行過都唔知。結果我收到大信封，要即日離職。

阿敏一路打機，一路聽我講今日發生乜事。我講完之后，佢笑笑口問我：「你係咪好鐘意寫小說？」

「唔知道。我成日嗌放棄，嗌完之后又繼續寫。情況好似唔成熟嘅情侶，成日分手，分完之后又復合。未諗清楚想點，所以放棄。冷靜之后諗清楚，又覺得其實係有愛。呢種愛係咪真係愛，我唔知。」我搬張圓凳埋電腦枱邊，一路飲熱朱古力，一路睇阿敏打機，一路好認真咁答。

阿敏睄我一眼，即刻收起笑容：「你即係覺得自己唔成熟？」

「係，但係無諗住改變。以前啱啱離家出走之后，日算夜算，算盡所有方法令自己活得更好。點知一次經濟不景加一次火燭就乜都無曬。我算到盡都唔夠個天咁盡，真係人算不如天算……倒不如好好活在當下，活得盡興就要滿足。」以前嘅錯折已經好遙遠，對我嘅影響遠遠不及而家手中嘅一杯熱朱古力。我又飲一啖——好飽肚、好暖、好舒服。

阿敏啱啱打完一場，無再開新一局。佢伸一伸懶腰，問我：「你點樣先會活得盡興？」

我諗都唔使諗，答：「寫小說。」

「你嘅邏輯有問題——話唔知自己係咪好鐘意寫小說，又好肯定咁話寫小說先會盡興——如果唔知，又點會咁肯定？」阿敏身體微微傾前，個樣好認真，直望入我雙眼。

「你以前讀書時有無參加過陸運會？」我放低個杯，坐直個人，同阿敏對望。「明明唔鐘意參加，又唔可以唔參加，唯有參加自己比較有興趣、比較擅長嘅項目。本來目的係『苦中作樂』，但係因為練習時全情投入，結果不知不覺變得認真、在意結果，不知不覺忘記起初單調乏味嘅苦，不知不覺得到傷痕、眼淚、挫敗感、毅力、堅持、成長……」

「明明過咗三十歲，你仲講到自己係好青春、好熱血嘅中學生！」阿敏忍唔住大笑。

「『青春』、『熱血』係形容心態，唔係形容年紀。我去到七老八十都可以好青春、好熱血！」我預咗阿敏會笑我，所以完全無尷尬。

「係咩？」阿敏依然笑唔停。

「唔信？我俾你見識下我嘅熱血青春！」趁阿敏唔為意，我撲前錫咗佢塊面一啖。「我中學嗰時就係噉樣示愛。」<script>chapter1();</script>